Noradapt er eit nasjonalt senter for berekraftig klimatilpassing. Vestlandsforsking driv senteret, som består av åtte partnarinstitusjonar.
Fleire jordskred vart utløyste etter at finvêrsperioden vart avløyst av styrtregn i Jølster i juli 2019. Bustadfeltet Årsetbakkane var blant områda som vart råka av jordskred og flaum. (Foto: Linda Olin Reite)
I åra som kjem vil klimaendringane påverke alle delar av det norske samfunnet. Ein brei og samordna innsats må til for å finne løysingar på dei områda som blir negativt påverka.
Gjennom Norsk senter for berekraftig klimatilpassing, med kortnamnet Noradapt, arbeider forskarar frå åtte forskingsinstitusjonar med å byggje og samle ny kunnskap om korleis ulike samfunnsaktørar kan tilpasse seg klimaendringane på ein berekraftig måte.
Kva er berekraftig tilpassing?
Arbeidet med klimatilpassing må ikkje vere i konflikt med dei andre berekraftmåla. Dette betyr særleg to ting:
1) Miljøvenleg klimatilpassing: At tilpassingstiltak ikkje må auke utsleppa av klimagassar eller føre til tap av biologisk mangfald; helst bør tiltaka også redusere klimagassutsleppa og auke det biologiske mangfaldet.
2) Risikovenleg utsleppsreduksjon: At tiltak for reduksjon av klimagassutslepp eller lagring av karbon ikkje må auke den fysiske klimarisikoen; helst bør slike tiltak også bidra til å redusere den fysiske klimarisikoen.
Du kan lese meir om utvikling av omgrepet "berekraftig klimatilpassing" i eit spesialnummer av det vitskaplege tidsskriftet "Weather, Climate, and Society".
OPNA I 2018
Den formelle opningsdatoen for Noradapt var 17. desember 2018. Statssekretær Atle Hamar (V), stortingsrepresentant Tore Storehaug (KrF) og leiaren i næringsutvalet i Sogn og Fjordane fylkeskommune, Karen Marie Hjelmeseter (Sp) stod for opninga.
LEVANDE LABORATORIUM
Noradapt er drive av Vestlandsforsking i Sogndal, som ligg sentralt i Vestland fylke.
Natur, landskap og vêrforhold i regionen gir eit unikt utgangspunkt for å studere endringane Norge vil møte i åra framover. Noradapt sitt omland fungerer m.a.o. som eit levande laboratorium i forskinga på klimatilpassing.
Kva gjer noradapt?
Rettleiing: Forskingsbaserte råd til næringsliv og til offentlege institusjonar som rettleiar andre.
Utgreiing: Utviklar brukartilpassa kunnskap om klimatilpassing i dialog med private og offentlege verksemder.
Næringsutvikling: Samarbeider med næringslivet om nye produkt og tenester innan klimatilpassing, t.d. risikodempande teknologi.
Forskingsformidling: Deler forskingsfunn med ålmenta i form av m.a. føredrag, webinar og kronikkar. Medarrangør av den årlege, nasjonale konferansen #Klimaomstilling i Sogndal.
Undervisning: Underviser i klimatilpassing på høgskule- og universitetsnivå, m.a. på masterprogrammet Climate Change Management ved Høgskulen på Vestlandet.